Өөрт буй юмыг бусдад харамгүй өгөхийг хэлнэ. (Хорин наймтын тайлбар толь)

Өглөгөөр төгс эдлэл, Шагшаабадаар амар амгалан (Тийн тайлбарын үндэс)

Судар шастирт номлосноор гурван зүйлийн өглөг байдаг.

НОМЫН ӨГЛӨГ: Дээдийн ном тэргүүтнийг ташаа хазгайгүйгээр номлох, ер аливаа эрдэм номыг үнэн сэтгэлээр шан харамжгүйгээр заан сургахыг хэлнэ.

АЮУЛГҮЙН ӨГЛӨГ: Дайн тулаан, хулгай дээрмийн аюул хийгээд үер ус, салхи шуурга, гал хөсийн аюул зэргээс өөрийн амиа үл хайрлан бусдыг аврахыг өгүүлж буй.

ЭДИЙН ӨГЛӨГ: Энэ нь ядуус тэргүүтэнд бодитой эд таваар, идээ ундаа, хөрөнгө мөнгө зэргийг сэтгэл харамгүйгээр өгч туслахыг хэлдэг ажээ.

Бурхан багш өглөгийн буян нь заавал эд юмтай хүнд хамаатай биш, ядуу хүний долоон өглөг байхыг заажээ. Энэ юу вэ хэмээвээс:

1. Биеийн өглөг - Энэ нь бусдын төлөө өөрийгөө золиослох хүртэл

2. Сэтгэлийн өглөг - Энэ нь бусдад халамж, анхаарал тавих гэх мэт

3. Нүдний өглөг – Энэ нь сайхан харц, өрөвдөж хайрласан харц гэх мэт

4. Нүүрний өглөг – Энэ нь тааламжтай инээмсэглэл, ялдам сайхан ааш араншин

5. Үгний өглөг – Энэ нь урамшуулах, зоригжуулах, сургах, сэтгэх сэргээх тэргүүтэн. Үгний өглөг маш хүчтэй.

6. Суудлын өглөг – Энэ нь хөгшин ядарсан, өвчтэй хүн, хүүхэд нялхас, хэнд ч суудал тавьж, хүндлэх зэрэг

7. Орон байрны өглөг – Энэ нь хоноглох, амрах, унтах ор дэвсгэр тэргүүтэн. Явуулын хүнийг хонуулаад, хооллож ундлаад явуулах, даарч хөрсөн хүнийг оруулж дулаацуулаад явуулах гэх мэт

Эдгээр нь бага гэхгүй өглөгийн буян ажээ. Бурханы номоор бол гуйсан хүнд юм өгөх нь жинхэнэ өглөг биш, хэн ч гуйгаагүй байхад нэг удаа бус байнга өглөг өгдөг байх, хариу хардаггүй, өгсөндөө харамсдаггүй, бардамнадаггүй, бусдад өгсөндөө баясч, өгсөн өглөгөө авсан хүнтэй нь мартах нь жинхэнэ өглөг болох ажээ. Хүмүүст адилхан хандаж, тэднийг элдэв байдлаар ялгаварлахгүй ая тус үзүүлэх нь агуу их өгөөмөр үйл болохыг хэлжээ.

 

Сэтгэгдэл үлдээх on ӨГЛӨГ ГЭЖ ЮУ ВЭ? ӨГЛӨГИЙН МӨН ЧАНАР. ХАДГАЛААД АВААРАЙ

Хариулт үлдээх

Таны и-мэйл хаягийг нийтлэхгүй.